Изложбата „Иницирај промена. Креирај гласно!“, ќе се одржи денеска, 10 декември 2025 година (среда), во галеријата „Драгутин Аврамовски – Гуте“, во Сули Ан, Стара скопска чаршија, со почеток во 19.00 часот.
На настанот ќе бидат претставени делата создадени на работилницата за емоции и уметност, реализирани со учество на 14 млади лица под менторство на психологот Тина Чачоровска и уметникот Доротеј Нешовски. Настанот го организира Здружението за промоција, едукација и заштита на човековите и здравствените права „Биди човек“, во соработка со Ротари клуб Скопје Интернационал и Факултетот за ликовни уметности Скопје.
Посетителите ќе имаат прилика да ги видат цртежите преку кои младите уметници ја отвораат темата за менталното здравје, за препознавањето на емоциите и за справувањето со нив, но и упатуваат повик за поголема поддршка, разбирање и отворен разговор.
Ќе ни претставува задоволство да бидете дел од овој настан, кој преку уметноста го отвора просторот за разговор, поддршка и разбирање на менталното здравје кај младите, велат организаторите.