Костадин Костадинов, лидер на партијата Преродба, го поучи премиерот Росен Желјасков дека во Македонија немало бугарско малцинство, туку сите што зборувале на „бугарски дијалект“ биле (македонски) Бугари.
„Во Македонија нема бугарско малцинство. Сите жители што го зборуваат бугарскиот дијалект таму се Бугари по крв, јазик и култура, без оглед на тоа како се дефинираат себеси“, рече Костадинов надвор од дебатата за недоверба на Владата.
„Секој бугарски граѓанин е свесен дека во Македонија нема бугарско малцинство. Отсекогаш станувало збор за Бугари, за македонски Бугари, за бугарска заедница, но никогаш за малцинство, бидејќи такво нешто не постои“, објасни првиот човек на партијата со 33 пратеници во Собранието со 240 члена.
Терминот „бугарско малцинство“, според Костадинов, првпат го вовел македонскиот премиер Христијан Мицкоски, кого го опиша како „познат србоман и најголем бугаромразец на Балканот“.
„Овој човек ја изгради целата своја политичка кариера зборувајќи против Бугарија и против Бугарите. За нас е необјасниво како е можно бугарски премиер да ја повторува реториката на Мицкоски“, додаде тој.
Според неговите зборови, таквата позиција не е само грешка, туку „неписменост, криминална небрежност или отворено национално предавство“.