Според пратеникот и поранешен лидер на СДСМ, Димитар Ковачевски, никој не може да го промени македонскиот идентитет и Францускиот предлог останува добро решение за продолжување на европскиот пат на Македонија.
„Никој не може да го промени македонскиот начин на гледање на историјата. Никој не може да го допре нашиот идентитет, бидејќи тоа е наш идентитет. Никој не може да нè спречи да бидеме Македонци“, изјави тој во „Само интервју“ на Канал 5.
За Ковачевски, главната пречка во разговорите со Бугарија било непризнавањето на македонскиот јазик во Европската Унија, а сега фокусот бил префрлен на вклучувањето на Бугарите во Уставот.
Тој подвлече дека договорот со ФРОНТЕКС е потпишан на македонски јазик и тој е вклучен во преговарачката рамка со ЕУ.
Зборувајќи за Францускиот предлог, Ковачевски, чија Влада пред четири години го прифати барањето на Софија поддржано од Париз за условување на почетокот на преговорите со впишување Бугари во Уставот, рече дека тој е избалансиран и нуди добро решение за процесот на европска интеграција на земјата.
„Тоа е избалансиран, добар предлог. Ќе остане актуелен и го сметам за добро решение“, изјави Ковачевски.