Поранешниот бугарски европратеник Ангел Џамбаски со нов напад врз Македонија преку етерот.
„Запомнете, македонистите во Македонија единствено можат да постојат ако продолжуваат со антибугарска реторика. Во моментот кога ќе бидат впишани Бугарите во Уставот, во моментот кога ќе бидат усвоени двата протокола од Заедничката комисија, во моментот кога ќе биде усвоен Францускиот предлог – македонизмот ќе исчезне. Тој нема свои морални, правни, историски основи“, изјави за бугарската телевизија Нова њуз заменик-претседателот на ВМРО-БНД, според кој „Францускиот предлог не е толку добар колку што можеше да биде. со него отстапивме од јазикот, што е тешка политичка грешка“.
„Во последните две години ништо не се случи во Скопје – ниту ги впишаа Бугарите во Уставот, ниту го запреа јазикот на омразата, ниту ги променија учебниците, ниту натписите на спомениците, ниту ги преведоа сите документи според соодветните договори. Ни се смеат в лице. Тие имаат неколку планови. Сегашниот чекор е заобиколување на Францускиот предлог и тоа го прават Мицкоски, Унгарија, Кремљ, се разбира, Белград и комесарката за проширување. Една дама од Словенија, која е во центарот на тој заговор, која имаше договорено да се внесат во извештајот вековните, многувековните, милијардавековните македонски идентитет и јазик, а тие ќе ветат дека по октомвриските избори ќе ги впишат Бугарите во Уставот, што беше и ќе остане лага“, додаде Џамбаски.