Министерството за внатрешни работи ќе поднесе кривични пријави за родителите но и за двете малолетнички кои физички го малтретираа 12 годишното девојче во скопската населба Аеродром. Оттаму информираа дека при разговорот со девојчето жртва бил идентификуван и еден од малолетниците кои снимал со мобилен телефон додека другите деца пак се уште се во фаза на идентификација. Велат и дека за случајот известен бил и јавен обвинител за малолетници и Меѓуопштинскиот центар за социјална работа.
- На 01.07.2026 во 19:30 часот во СВР Скопје 31-годишна жена пријави дека на 30.06.2026 околу 22:00 часот во парк на подрачјето на општина Аеродром нејзината 12-годишна ќерка била физички нападната од 14-годишна малолетничка која била заедно со нејзина другарка и кои претходно ја натерале во два наврати да клекне на колена и да се извинува. Потоа откако тргнала да си оди била физички нападната од друга малолетничка, а целиот чин бил снимен со мобилен телефон од повеќе малолетници кои биле присутни, а едниот од нив го познавала. Истиот ден во полициска станица бил извршен службен разговор со две малолетнички во присуство на нивните родители, велат од МВР.
Насилството што се случи во Аеродром е уште еден инцидент во низата на меѓуврснички насилства кои во Македонија ги има се почесто. Професорката Елизабета Секирарска вели дека и семејството на прво место а потоа и училиштето треба да го изградат карактерот на едно дете. Според неа, потребно е училиштата треба да изградат безбеден и сигурен простор каде што децата жртви ќе се чувствуваат слободни да пријавуваат насилство.
Инцидентот во Аеродром предизвика бурни реакции на социјалните мрежи. Граѓаните бараат построги казни за малолетниците кои ќе се однесуваат насилство, враќање на реонските полицајци во училиштата но и во наслебите и поголема транспарентност од институции во однос на казните за родителите на децата насилници.
Според статистиките во првата половина од 2026 година во Македонија биле регистрирани 93 инциденти на меѓуврсничко насилство во 64 училишта низ државата. Последните податоци на УНИЦЕФ пак покажуваат дека 23 проценти од младите на возраст од 13 до 15 години во Македонија изјавиле дека биле жртви на врсничко насилство барем еднаш во последните неколку месеци, а една третина од младите опфатени со анкета за безбедност на интернет изјавиле дека доживеале и онлајн малтретирање.