„Структури од СДС дејствуваат со бугарската антимакедонска пропаганда и целта им е напад на ВМРО-ДПМНЕ и претседателот Мицкоски, кои се единствената брана на македонските интереси.“ – истакна на денешната прес-конференција Миле Лефков, пратеник и член на Извршниот комитет на ВМРО-ДПМНЕ.
Натаму Лефков посочи: До нас стигнаа информации кои укажуваат на јасна поврзаност на бугарската антимакедонска пропаганда и политички структури поврзани до и од СДС. Според тие сознанија, постои целосна поврзаност и соработка на негирањето на македонскиот идентитет и јазик, како и и напад на ВМРО-ДПМНЕ и премиерот Христијан Мицкоски, кои се единствената брана за македонските интереси.
Информациите говорат дека одредени кругови во СДС и блиски до нив, се целосно финансирани од бугарски фондови, заради оркестрирано измислување и ширење лаги и конструкции за политичари од ВМРО-ДПМНЕ и државниот врв. Ова што го зборуваме многу јасно се гледа и од брзината, со која фабрикациите за ВМРО-ДПМНЕ и премиерот Мицкоски од бугарските медиуми, се шират во македонскиот етер од структури блиски до СДС.
Како поткрепа на оваа антимакедонска пропаганда, стои Венко Филипче и неговата скриена за јавноста позиција, дека ќе прифати внесување на Бугарите во Уставот, без било какви барања. Целта на целиот напад и акцијата е да се нанесе штета на ВМРО-ДПМНЕ, а во игра се и пари.
СДС се обидува да се наметне како чинител во целиот процес, од кој подоцна би зависела надворешната политика на државата. Ваквата пропаганда покажува само едно: дека СДС нема намера да се наметне со програма на избори, туку својата безидејност ја заменува со распродажба на македонските интереси, обидувајќи се да одигра на страната на Бугарија. – нагласи на денешната прес-конференција Миле Лефков, пратеник и член на Извршниот комитет на ВМРО-ДПМНЕ.