Доктор Ненад Лазаров јавно алармира дека во околината на клиничките установи во Скопје дејствува добро организирана група лица кои се претставуваат како просјаци и лица со инвалидитет, а според него всушност се работи за професионална мрежа што секојдневно прибира значителни суми пари од граѓаните.
Во објава на социјалните мрежи, тој напиша:
„Најсиромашните што движат по клинички, скромни стуткани луѓе со секакви маки дојдени по болнициве најчесто се жртва и даваат пари на овие хоштаплери што глумат просјаци и инвалиди а не се, најверојатно и делат со нив од последните парички. Стратешки се распоредени по клинички.
Ве молам денар да не им давате, цела мафија се организирана секој ден илјадници денари укрупнуваат по локални продавници дури и во црквата на клинички, заработуваат повеќе од сите нас, пред некој ден пред мои очи 7000 денари укрупни еден од нив! Со кола доаѓаат со кола си одат. Да сум власт, ова се треба на долго време да се затвори за пример.“
Доктор Лазаров директно ги повикува граѓаните да не даваат пари на овие лица, тврдејќи дека станува збор за организирана криминална дејност која систематски ги искористува најранливите категории – болните и нивните најблиски.
Според неговото сведоштво, лицата доаѓаат и заминуваат со возила, а дневно успеваат да соберат илјадници денари, при што тој наведува конкретен случај кога пред неговите очи еден од нив собрал 7000 денари за кратко време.
Објавата предизвика голем број реакции кај граѓаните на социјалните мрежи, при што дел од коментаторите ја потврдуваат слична појава, додека други бараат реакција од Министерството за внатрешни работи и од Град Скопје.