Еден ден Македонија ќе го заврши својот трнлив пат кон целосната западна интеграција. Меѓутоа, политичката, економската и културната реалност на светот кој што доаѓа ќе биде сосема различна од епохата кога Македонија зачекоруваше кон својата независност, анализира во вестите на Сител амбасадорот и екс вицепремиер за европски прашања Ивица Боцевски по повод историската посета на индиската претседателка на Македонија.
,,Глобалниот геополитички центар се враќа кон Азија, онаму каде што и секогаш бил, пред подемот на Европејците во ерата на поморските откритија и потоа со индустриската револуција. И покрај тоа што Македонија останува составен дел на европскиот пазар, сепак за земјата и за нејзините граѓани е нужно да се остане дел од глобалните трендови”, вели амбасадорот Боцевски.
Според него македонското знаме мора да се вее во сите точки каде што се создава утрешнината, било да е тоа Њу Делхи, Пекинг, Мумбаи, Шангај, Бразилија, Сао Паоло, Јоханесбург, Кејптаун, Џакарта и другите раѓачки алфа – центри.
,,Да се надеваме дека нејзината екселенција, претседателката Драупади Мурму, ќе повлече нога, па Скопје полека ќе си влегува во својата улога на политички центар на една современа и глобализирана нација”, вели Боцевски во интервјуто кое дава целосна слика за важноста на посетата на Мурму на Македонија која е само една од трите европски држави кои ги посети.