Првиот македонски шеф на дипломатијата Денко Малески смета дека иднината на Македонија е црна ако се чека на трошките кои паѓаат од масите на Вашингтон, Будимпешта и други земји кои тој ги нарекува одпадници.
Малески кој своевремено изјави дека Македонците и Бугарите биле ист народ сега тврди дека Македонија е таа која што нема капацитет да најде решение за спорот со Бугарија.
Тој се обидува да докаже дека за Македонија единствена гаранција е ЕУ а САД ја става меѓу земјите од кои не треба да се чекаат трошки.
,,На нерешениот руско-украински конфликт сега се надоврза војната на Израел и на Америка против Иран. Како ќе изгледа светот откога ќе завршат овие војни, и кога воопшто ќе завршат, само еден Бог знае. Тоа, секако, нема да биде истиот свет. А Македонија? Нема анализа во светот која не се согласува со фактите дека најбезбедното пристаниште за мала држава како Македонија е ЕУ. Дури и оние кои не мислат дека останувањето надвор од членството не мора да значи и брз крај на државата, се согласни дека никаде Македонија нема да ги најде сите елементи за опстанок како во ЕУ. Имено, ЕУ нуди безбедност, економски просперитет, демократска трансформација, финансиска поддршка и поддршка за правна држава, се на едно место”, пишува Малески.
Според Малески Македонија во надворешната политика почнува да наликува на Србија која, во отсуство на способност да ги апсолвира прашањата кои ја кочат на патот кон ЕУ, пред се проблемот со Косово, балансира.
,,Во отсуство на способност да ги апсолвира прашањата кои ја кочат на патот кон ЕУ, пред се проблемот со Косово, (Македонија) балансира помеѓу големите сили и гради односи со „отпадниците“ од ЕУ, како Унгарија, на пример. Иста е и нашата формула за опстанок: во отсуство на способност да го апсолвираме прашањето со Бугарија, се обидуваме да правиме некаков баланс меѓу Брисел, Вашингтон и Будимпешта. Оваа карикатура на балансирање е затоа што сме премногу мали за класично балансирање меѓу големите сили какви што се САД, Русија, Кина, Индија… Имено, додека Србија е регионална сила и има извесна моќ, Македонија е во категоријата на мали држави (small states) кои се премногу слаби за таква политика”, смета Малески.
Тој воопшто не е оптимист за иднината на Македонија.
,,Згора на тоа, тоа е политика за гол опстанок која не лишува од секакво влијание во светот која би ја добиле со членството во ЕУ. Вон од преговарачкиот процес, „со децении ако треба“, како што вели премиерот, безбезбедноста, благосостојбата, демократската трансформација, финансиската поддршка и правната држава, ставени пред нас на европската маса, ќе ја наоѓаме во трошките кои паѓаат од масите на Вашингтон, Будимпешта или кој и да е. Така гледано, воопшто не сум оптимист за иднината на нашата држава која, неминовно, ќе продолжи да слабее на сите фронтови”, заклучува Малески во текст кој го објавуваат бугарски медиуми.