Првиот заменик премиер на Северна Македонија и кандидат за градоначалник на Општина Чаир, Изет Меџити, денеска упати јавен предизвик до неговиот противкандидат Бујар Османи. Меџити побара Османи да одговори дали е точно дека најмалку двапати остварил директни средби со поранешниот премиер Никола Груевски во Будимпешта.
„Ќе поставам прашање – дали е вистина дека најмалку двапати бил во директна посета со Груевски? Ќе почекам да видам како ќе одговори, па потоа ќе му кажеме кога било и како било“, изјави Меџити пред медиумите.
Ова обвинување доаѓа во услови на засилена политичка кампања пред локалните избори, при што Меџити ветува дека ќе обелодени детали за наводните средби откако Османи ќе даде одговор. Засега, нема официјална потврда или демант од страна на Османи за овие тврдења.