Преку потпишување на меморандум помеѓу Агенцијата ИНОВА и државните универзитети, се официјализираше соработката насочена кон зајакнување на научно-технолошкиот развој. Министерката за образование, Весна Јаневска, порача дека академската заедница е столбот на знаењето и иновациите.
Од амфитеатрите директно во светот на бизнисот и иновациите. Ректорите на 7-те државни универзитети и Агенцијата за иновациии, научно-технолошки развој и претприемаштво ги здружуваат силите и потпишаа Меморандум за долгорочна соработка. Со ова, студентите добиваат поддршка за истражувања, стартапи и брзо поврзување со бизнис компаниите. Надлежните очекуваат дека ова ќе резултира со развој на студентското претприемништво.
- „Ова партнерство ќе значи конкретни активности. Студентите од клупите влегуваат во лаборатории и компании, поддршка на стартап иницијативи во рамки на универзитетите, развој на иновациска инфраструктура, подобар трансфер на технологии и посилно поврзување со бизнис секторот“, изјави директорката на ИНОВА, Даниела Димовска.
Јаневска најави дека државата останува фокусирана на инвестиции во науката, согласно Стратегијата за паметна специјализација.
- „Се радувам што преку ИНОВА ја зајакнуваме соработката со универзитетите, затоа што токму академската заедница е клучниот двигател на знаењето, иновациите и општествениот напредок. Верувам дека заедно ќе изградиме поквалитетен високообразовен систем, ќе создадеме повеќе можности за научни и технолошки достигнувања и ќе развиваме кадар подготвен да одговори на современите предизвици.“
Министерката потенцираше дека новата законска регулатива ќе понуди подобра стимулација за научната работа и истражувањата.
- „Како Министерство за образование и наука, остануваме посветени на поддршката на универзитетите. Поставуваме нова законска рамка со повеќе можности за стимулација на трудот на академската и научната заедница. Обезбедуваме континуирани инвестиции во високото образование, науката и истражувањата, што се потврдува преку средствата кои се издвојуваат од државниот буџет.“
Според Јаневска, минатогодишните 6 милиони евра наменети за иновативни проекти на универзитетите, МАНУ и компаниите се доказ за сериозниот пристап кон оваа област. Покрај министерката и директорката на ИНОВА, на настанот свое обраќање имаа и премиерот Христијан Мицкоски, како и ректорите на државните високообразовни установи.