Познатиот адвокатот и борец за правата на македонското малцинство во Бугарија, Тони Менкиноски, и кандидат за судија што ќе ја претставува Македонија во Европскиот суд за човекови права му одговори на контроверзниот бугарски европратеник Ангел Џамбаски кој на социјалните мрежи отворено се спротивстави на кандидатурата.
Џамбаски вели дека било „неприфатливо е Бугарија да дозволи ова лице да влезе во таква антинационална и затоа антибугарска организација како што е ЕСЧП“, бидејќи, биографијата на Менкиноски е, како што тој наведе, „повеќе од скандалозна“.
Менкиноски веднаш упати одговор кон Џамбаски, што „Нова Македонија“ го пренесува во целост.
Г-дин Џамбаски,
Кога веќе ме споменувате по име и се обидувате да ме дисквалификувате со политички квалификации, најмалку што можам да направам е да одговорам со факти – а не со лични напади. Токму фактите и европските институции јасно покажуваат дека прашањето кое го отвораме не е „антибугарско“, туку дел од долгогодишна правна и демократска дебата во рамките на Советот на Европа, а во корист на нас Македонците.
1. ВЕНЕЦИЈАНСКАТА КОМИСИЈА УШТЕ ВО 2008 ГОДИНА Ѝ ПРЕПОРАЧА НА БУГАРИЈА УСТАВНИ ИЗМЕНИ
2. КОМЕСАРОТ ЗА ЧОВЕКОВИ ПРАВА ТОМАС ХАМАРБЕРГ ДАДЕ ИСТОВЕТНА ПРЕПОРАКА
Во својот официјален извештај од 2008 година, комесарот Хамарберг: „изрази сериозна загриженост за ограничувањата на слободата на здружување во Бугарија, и ја повика државата да го измени Уставот за да се усогласи со европските стандарди“ . Ова повторно е документ на Советот на Европа – највисоката институција за човекови права на континентот.
3. И ДРУГИ ЕВРОПСКИ ИНСТИТУЦИИ ГО ДЕЛАТ ИСТИОТ СТАВ
Во изминатите две децении, повеќе тела на Советот на Европа, меѓународни правни експерти, па дури и европратеници од различни политички групации потврдија дека: „проблемот не е во малцинствата, туку во уставната рамка на Бугарија, која треба да се усогласи со европските демократски стандарди“. Значи, ова не е „измислица“ ниту мислење на едно лице. Тоа е меѓународен правен став кој постои многу години пред моето име некој да го спомене во бугарските медиуми.
4. НАМЕСТО ЛИЧНИ НАПАДИ — ФАКТИТЕ СЕ ЈАСНИ
Ниту сум антибугарски, ниту сум дел од каква било „кампања“. Јас само се повикувам на официјални документи на европските институции – институции што Бугарија сама ги прифатила како правно релевантни.
5. И КОНЕЧНО – МОЈАТА ПОРАКА КАКО МАКЕДОНЕЦ
Ние, Македонците – без разлика каде живееме – секогаш ќе се бориме мирно, демократски и упорно за нашите основни човекови права: правото на самоопределување, правото на здружување и правото на достоинство. Никогаш нема да се откажеме од овие вредности.
Не затоа што се против некого, туку затоа што се за слобода, еднаквост и почитување на човекот. И затоа ние Македонците никогаш нема да попуштиме пред никого. Ќе останеме цврсти и ќе продолжиме да ги надминуваме сите предизвици пред нас. Ова го докажавме во текот на изминатите два века. Ако некои не се свесни за ова, можам само да кажам дека е жално – бидејќи говорите исполнети со омраза и нетолеранција никогаш никому не донеле успех.