„Пустец е доказ дека припадноста не се брише. Оти коренот останува, дури и кога над него дуваат силни ветрови. И дека постојат луѓе што не чекаат благодарност, туку само можност да продолжат онаму, каде што другите би се откажале!“ – порача денеска премиерот на Република Македонија Христијан Мицкоски во обраќањето на Македонскиот фолклорен фестивал Преспа во Општина Пустец, во Албанија. Ова го објави Македонската информативна агенција – МИА
„Ви благодарам што останавте свои. Ви ветувам: оваа држава ќе знае да ви возврати со почит, со работа и со постојана поддршка. Да живее секој, кој го чува својот идентитет со достоинство . Да живее заедништвото што не признава граници, туку само вистински вредности.“ – истакна Мицкоски.
Според него, „во последно време сме сведоци како се обидуваат да не негираат, да не надсинхронизираат, да не направат модерни, да не бришат, да се обидуваат да го оспоруваат сето она што е македонско“. „Но она што го гледам и она што го чувствувам во Пустец за мене е големо вдахновение да продолжиме да ги поддржуваме Македонците насекаде во светот и да покажеме дека сме Македонци со многувековен посебен идентитет, кои говорат на свој мајчин јазик, различен од сите балкански јазици. Ние сме горди Македонци и ќе останеме тоа да бидеме.“ – истакна премиерот Мицкоски.
Нагласувајќи пред присутните дека тие се лојални граѓани на Албанија, тој им порача дека во него и во Владата на Република Македонија може да гледаат брат и пријател, но и оти може да сметаат на помош за се, што им е потребно. „По седум години национално понижување и ограбување од политичари, кои сега сега се минато, Македонија доживува економска и национална преродба во овие 13-14 месеци. Ние не сме ниту Грци, ниту Бугари, ниту Срби, туку сме Македонци, во Албанија и насекаде во светот.“ – додаде Христијан Мицкоски.
Во обраќањето пред жителите на Пустец и Мала Преспа нагласи оти верува дека дека една нација ја чини токму врската меѓу луѓето, кои ја чувствуваат како своја, без разлика каде живеат. „И кога сме блиску и кога сме далеку, кога сме во татковината, или надвор од неа, остануваат исти чувството, идентитетот, припадноста. Вашето место во оваа приказна е посебно. Не само затоа што географски сме во различни држави, туку затоа што по сè друго сте длабоко во срцето на нашата татковина. Вие сте синоними за истрајност, за тивка лојалност, во исто време за достоинство и скромност. И кога никој не ве прашувал, и кога не ве спомнувале, вие останавте тоа што сте. Ѝ останавте лојални на државата, во која живеете.“ – рече Мицкоски.
Тој посочи дека во изминатите децении се менувале многу работи, политики, влади, граници, но тие останале доследни. „Овде, македонскиот јазик не е нешто, што се одржува по навика, тукуе нешто, што се пренесува со љубов. Овде песната, обичаите, спомените, се дел од животот, секојдневие. Токму затоа постои чувство на длабока почит кога човек ќе дојде овде. Не од формалност, туку од убедување. Жалам што не ве заобиколија пропагандите, кои го следат Македонецот низ историјата. Ги видовте, ги почувствувавте, ги живеевте, преку замени, преку притисоци, преку тивки, но упорни обиди да се разниша она, што е ваше. Но уште повеќе сум горд што не потклекнавте. Не ја прифативте удобната заборавеност. Не се срамевте од себе. Не дозволивте никој да ви го дефинира идентитетот наместо вас. И за тоа ви се поклонувам.“ – порача македонскиот премиер Мицкоски.
Тој нагласи дека една држава ја покажува својата зрелост преку тоа како се однесува со оние, што не ѝ се во центарот и додаде дека денеска сакаат да покажат оти учат од минатото. „Дека сакаме да воспоставиме нов однос со вас, не декларативен, не симболичен, туку вистински. Со поддршка што ќе се гледа, со соработка што ќе се чувствува, и со внимание, што нема да згасне веднаш по оваа средба. Свесен сум дека секојдневието овде носи свои предизвици. Но исто така сум уверен дека има иднина за Пустец. Има иднина за секое дете, што учи на мајчин јазик, за секое семејство, кое сака да остане овде, за секој млад човек, што верува дека вреди да се остане свој и на своето. Затоа како Влада имаме одговорност да бидеме поддршка. Во образованието, во културата, во економскиот развој, во сите форми на прекугранична соработка. Не како милост, туку како обврска. Не затоа што некој нè притиска, туку затоа што веруваме дека тоа е исправно.“ – укажа Мицкоски.
Тој порача дека посакува младите во Пустец да пораснат со чувство на припадност, што не се заснова врз страв, туку врз самодоверба. „Сакам секој родител овде да знае дека вреди што го учи своето дете на мајчин јазик. Сакам да создадеме услови тука да се живее подобро, не со празни зборови, туку со видливи резултати. Ова не е последна средба. Ова е прва од многуте. Затоа што нашата работа дури сега почнува. Ние не сме овде само за говор. Ние сме овде за врска, што ќе се гради секој ден, со проекти, со програми, со политика, што ќе допре до вас, како што вашата истрајност допре до нас. Затоа, нека се слушне јасно: Ова не е граница – ова е врска. Ова не е далечина – ова е блискост. Ова не е фуснота во нечиј извештај – ова е глава во нашата национална приказна!“ – нагласи премиерот на Република Македонија Христијан Мицкоски во обраќањето на Македонскиот фолклорен фестивал Преспа во Општина Пустец, во Албанија.