Потпретседателот на Собранието, Антонио Милошоски, во Дневникот на ТВ Сител уште еднаш го повтори цврстиот став на својата партија ВМРО-ДПМНЕ дека промена на Уставот е можна само со гаранции дека ќе води до членство во Европската Унија.
„Ние не сметаме дека уставните измени треба да се направат, а притоа таквиот чекор да нè однесе во неизвесност и да бидат направени за нешто за коешто не може да ја постигнете целта. Ние веќе едни такви уставни измени имавме. Тогаш СДСМ и ДУИ ги промовираа како уставни измени во однос на уставното име на Република Македонија, дека тоа ќе ги отвори вратите на ЕУ, дека ќе има бесплатно здравство, бесплатни вакцини, стипендии, беше таа една голема кампања, но видовме дека наместо отворање на поглавјата и преговори со ЕУ, ние добивме затворена врата пред нос од страна на Франција, а потоа и од соседна Бугарија. Поучени од тоа искуство, сметаме дека би било лековерно да се оди во уставни измени, а притоа да немате извесност во процесот дека ќе си зачувате своја национална посебност и дека ќе стигнете до целта како полноправна земја членка на ЕУ“, изјави пратеникот.