Премиерот Христијан Мицкоски го разоружа пратеникот Скендер Реџепи, кој го праша: „Дали познавањето македонски јазик за Албанците е задолжително“.
На пратеникот од Европскиот фронт тој му укажа дека македонскиот јазик според Уставот е официјален на целата територија на државата, исто како и албанскиот.
„Ако ги ставите слушалките, ќе видите дека се преведува на албански. Јас немам проблем со ниту еден јазик. Не ми пречи на мене, не знам зошто имате потреба да викате. Напротив, апсолутно не ми пречи, слободно да си го користите албанскиот јазик, дури и се трудам да го учам и да го научам, еве отворено ќе ви кажам. И се надевам дека за некоја година ќе можам и јас да не ги користам слушалките и кога зборувате на албански јазик вака грлато кога мислите дека некој ќе се уплаши од тоа ќе можам да го разберам тоа што го кажувате“, рече Мицкоски од собраниската говорница.
Зборовите на претседателот на македонската Влада беа одговор на тврдењето од Реџепи изнесено пред него со висок тон: „Провладините медиуми заедно со владините министри во последно време отворија едно прашање дали во оваа економска криза дали има потреба министрите во Владата да имаат преведувачи Албанци и дали македонскиот јазик треба да биде задолжителен јазик за сите граѓани. И премиерот им рекол и на министрите Албанци дека ако не зборуваат македонски ќе ги разреши“.