Премиерот Христијан Мицкоски денеска потврди дека ги примил предлозите за нови министри од коалициските партнери ВРЕДИ и ЗНАМ и дека за него тие предлози се сосема прифатливи.
„Да, ги имам предлозите и за новите министри од ВРЕДИ и од партијата ЗНАМ, но ќе оставам тие да ги кажат. За мене тие предлози се сосема во ред и очекувам да имаме уште поуспешна работа во новиот состав на Владата“, изјави Мицкоски за време на посетата на Општина Кисела Вода.
Премиерот посочи дека ВРЕДИ во реконструираната Влада ќе ги преземе министерствата за правда, за односи меѓу заедниците и за култура и туризам.
Според информации од медиумите, од редовите на ВРЕДИ се предложени:
- Седат Сулејмани, досегашен заменик-министер, за министер за култура и туризам;
- Агон Ферати за министер за односи меѓу заедниците;
- Јетон Шасивари, професор по уставно право на Универзитетот на Југоисточна Европа, за министер за правда, кој ќе го наследи Игор Филков.
Предлог-составот на реконструираната Влада се очекува да биде испратен до Собранието до петок, а изборот на новиот владин состав треба да се случи најдоцна до средината на јули.