Премиерот Христијан Мицкоски го обвини СДСМ дека ја политизира и прави естрада од случајот со затруената вода за пиење во Гостивар, бидејќи додека ја напаѓа власта ниту еднаш не повика за одговорност од градоначалникот.
„Треба тука да дадеме одговор на едно друго прашање за коешто СДСМ до овој момент не даде одговор, а тоа е: ако тие лица имаат одговорност, а да речеме за градоначалникот на Општина Гостивар нема одговорност, бидејќи правото на оваа дејност е на општинското претпријатие, не е на државата. Државата не ја преработува водата, не ја испраќа во системот и не ја продава на потрошувачите, туку локалното водоводно претпријатие кое е во директна надлежност на општината. Зошто ова го кажувам? Не го кажувам за да ја префрлам вината, туку за да кажам дека намерата на СДСМ не е во насока на тоа да се бара вина, туку да се политизира целата работа и да се прави естрада“, изјави претседателот на Владата во „Тема на денот“ на ТВ Сител.