Премиерот Христијан Мицкоски во интервју за МРТ, по повод две години од мандатот на Владата, изјави дека зад провокациите што се случуваат во последниот период стои организирана бугарска кампања, која се спроведува преку еден или двајца политички ликови во земјава.
„Ниски страсти и организирана кампања која овој период е забележлива. Ние сме зафатени со реконструкцијата и го користат слободниот простор, еден, двајца политички ликови во државава да се обидат да промовираат нешто кое никој не може да го прифати. Ова е еден поширок обид за влијание тука“, рече Мицкоски.
Тој нагласи дека во политиката многу малку верува во случајности.
„Ако некогаш помислиш дека работите во политиката се случиле случајно, верувај не е така, не си во право, затоа што ти само не си бил информиран тоа што некој го планирал“, додаде премиерот.
За односите со Бугарија
Мицкоски посочи дека ако за Македонија важи правилото дека договорот се почитува, тогаш тоа треба да важи и за Бугарија. Сепак, како што рече, источниот сосед не сака да ги исполни своите обврски, особено да ги спроведе пресудите на Судот за човекови права во Стразбур.
„Со други зборови ќе им дозволи на припадниците на македонската заедница да се организираат, културно, социолошки, општествено. Тие тоа не го прават, затоа што таа живковистичка политика која трае со децении, негаторска кон македонскиот идентитет им внесува страв во коски“, истакна Мицкоски.
Тој додаде дека бугарските политичари не се откажуваат од Протоколите 1 и 2, ниту од историската комисија, и потсети на говорот на сегашниот бугарски премиер од 2019 година во Санкт Петербург, каде си ги присвојува Кирил и Методиј и ја слави Санстефанска Бугарија.
Позицијата на Владата
Мицкоски беше дециден дека Владата нема намера да влезе во непредвидлив процес без јасни гаранции.
„Кога ќе ни каже некој да го смениме Уставот, добро, но што потоа? Нашата цел како влада е со мудрост, тактика, стратегија да се обидеме да го исправиме тоа кое е погрешно направено“, порача премиерот.