Дамнешната заложба на православните верници во Македонија на прагот на реализација – Светиот архијерејски синод на Македонската православна црква на својата денешна седница донесе одлука за основање Фонд за поткрепа на многудетни семејства.
„Светиот синод ги разгледа и ги усвои годишните извештаи од епархиите на МПЦ–ОА во татковината и во дијаспората, при што обрна посебно внимание на оние показатели кои сведочат за демографската состојба кај македонскиот православен народ. Воден од пастирска грижа, Светиот архијерејски синод одлучи да формира Фонд за поткрепа на многудетни семејства“, соопшти МПЦ-ОА.
На седницата беа разгледани и други прашања од важност за функционирањето на македонската црква.
Разгледувајќи ја состојбата на духовното и културно богатство на македонските храмови и манастири, Синодот со жалење констатирал дека тоа се наоѓа во лоша состојба поради недостигот од стручни кадри за конзервација. Светиот синод апелира до надлежните институции неодложно да преземат соодветни мерки со цел „да го зачуваме она што ни е оставено од нашите претходници“.
Како основач на воспитно-образовните институции при МПЦ-ОА, Синодот ја поздравил работата на Управата на Богословијата, која учебната 2025/26 година спроведе наставна програма од 4 години, а денот за упис на нови ученици ќе биде на 19 јуни 2026 година.
За нов член во постојаниот (работен) состав на Синодот е избран митрополитот Струмички г. Наум, а за негов заменик митрополитот Европски г. Пимен.