Најлесниот начин како можеме да се движиме напред и да ги решаваме нашите меѓусебни прашања е ако Бугарија ги отвори вратите и дозволи да ги отпочнеме преговорите и да знаеме дека сите предизвици може да се решат, но да бидат принципиелни предизвици. Но за прашања поврзани со историја, идентитет и јазик, оваа Влада не е подготвена да преговара.“ – рече Муцунски.
Шефот на македонската дипломатија попладнево ќе ја придружува претседателката Сиљановска – Давкова на средбата со бугарската претседателка Илијана Јотова.
– Сè повеќе е потребен дух на доверба, затоа што во моментот треба да бидеме искрени и меѓу себе, но постои висок степен на недоверба од двете страни. Таа почнува со хистерија од минатото, насочена кон создавање негативен поглед, поврзан со нашата држава, кој се прелева и во внатрешната атмосфера кај нас – рече Муцунски.
Нашите позиции, вели тој, не се променети, но сакаме да градиме дух на позитивна атмосфера. Токму тоа тој утрово го кажал и пред бугарските новинари. – Реков многу е лесно да бараме причини коишто не делат, но дајте наместо да се насочиме на минатото, на прашања кои не се важни за европскиот процес, прашања поврзани со идентитет, историја, со јазик – тие се автохтони прашања на една земја и не треба да бидат дел од европскиот процес – да се насочиме на тоа што е важно и значајно за нашите две држави, а тоа е заедничката иднина во Европската Унија. Тоа е пораката којашто ја праќаме од Софија – истакна Муцунски.
Во обраќањето на состанокот на министрите за надворешни работи на ПСЈИЕ во рамки на бугарското претседавање рече дека проширувањето веќе не е само технички пристапен процес, туку стратегиска инвестиција во безбедноста, стабилноста и конкурентноста на Европа.
Интеграцијата би била доверлива, според него, кога би се почитувале сите оние резултати и реформи коишто се направени, а не отстапките.
– Дефинитивно и тоа е нашата јасна позиција. Особено по самитот во Тиват постои огромен прозорец којшто се отвора од страна на Европската Унија насочена кон Западниот Балкан. Но, тој прозорец во преден план треба да ги стави земјите, коишто ги исполнуваат реформите поврзани со европските критериуми, но и земјите коишто имаат целосна усогласена заедничка надворешна и безбедносна политика со Европската Унија – изјави тој.
Од таа гледна точка, вели Муцунски, ние сме модел земја и нашата држава е држава којашто спроведува европски реформи на дело и којашто во делот на надворешната и безбедносната политика е предвидлив и доверлив партнер.