Пратеникот и лидер на бугарската партија „Преродба“ Костадин Костадинов денеска во бугарскиот парламент поднесе иницијатива со која македонскиот јазик би бил третиран како бугарски дијалект. Со тоа продолжува политиката на негирање на македонскиот јазик и посебност.
Новата иницијатива повторно ја отвора чувствителната тема и едно лингвистичко прашање го претвора во политичко средство за притисок. Костадинов не е првпат од парламентарната говорница да ги застапува овие ставови – претходно отворено тврдеше дека македонскиот јазик е дијалект на бугарскиот и дека македонските говори се дел од бугарското јазично подрачје.
Од македонска перспектива, најновиот потег се доживува како директен напад врз македонскиот јазик, идентитет и историска посебност, особено затоа што доаѓа од висок политички претставник на соседна држава.
Иницијативата повторно го поставува прашањето дали Софија ќе продолжи да го користи јазичното и историското прашање како инструмент во односите со Скопје.
Додека Македонија се соочува со политички и европски предизвици, од бугарската сцена повторно пристигнува порака со која се оспорува еден од основните елементи на македонскиот идентитет – јазикот.
Останува да се види дали предлогот на Костадинов ќе добие поширока поддршка во бугарскиот парламент или ќе остане уште еден радикален политички гест насочен кон наметнување на бугарските историски и јазични толкувања.