Нови правила за возење во Грција: што мора да има секој возач од Македонија во автомобилот, за да избегне казна?

Строг стандард за комплетот за прва помош – најголемата новина

Најзначајната измена се однесува на автомобилската аптека. Според новите правила, кои стапуваат во сила од 18 јуни 2026 година, секое возило мора да има комплет за прва помош што е усогласен со европскиот стандард ДИН 13164:2022 или еквивалентен ИСО-стандард.

Ова значи дека повеќе не е доволно да се има каква било аптека, туку таа мора да содржи прецизно дефинирани елементи.

Меѓу задолжителните ставки се:

– термално (изотермално) спасувачко ќебе;

– медицински маски;

– стерилни завои и облоги;

– ракавици за еднократна употреба;

– облога за изгореници;

– ножици за прва помош.

Вкупно, комплетот треба да содржи најмалку 16 пропишани елементи. За возачите што немаат соодветен комплет е предвидена казна од околу 30 евра.

Задолжителна опрема во автомобилот – што мора да имате

Покрај новиот комплет за прва помош, грчките прописи ја задржуваат и класичната задолжителна опрема што полицијата редовно ја проверува, особено во туристичките региони и на автопатиштата.

Секое возило мора да содржи:

– апарат за гаснење пожар (исправен и сервисиран);

– сигурносен (предупредувачки) триаголник;

– рефлектирачки елек (достапен во кабината);

– резервна гума или сет за поправка;

– комплет за прва помош (по нов стандард).

Овие елементи се задолжителни според грчкиот закон и нивното отсуство може да доведе до парични казни на самото место. Како дополнителна препорака (иако не секогаш строго казнива) се наведува и поседување резервни светилки за светлата.

Засилени контроли

– туристите под лупа

Грчките власти во последните години значително ги зголемуваат контролите во текот на летната сезона. Полицијата не врши проверки само на граничните премини туку и внатре во земјата, особено на автопатиштата и во близината на популарните туристички дестинации. Практиката покажува дека странските возачи често се предмет на рутински проверки, при што најчесто се контролира токму задолжителната опрема.

Не само опрема – и нови сообраќајни правила

Покрај опремата, новиот закон за сообраќај носи и други построги мерки:

– пониски ограничувања на брзина во населени места (околу 30 км/ч);

– високи казни за користење мобилен телефон;

– строги санкции за пречекорување на брзината (од 150 до 750 евра и одземање на дозволата).

Овие мерки важат еднакво и за домашните и за странските возачи.

Документи што мора да ги имате при контрола

Освен опремата, при евентуална контрола од грчката полиција, задолжително е да поседувате:

– важечка возачка дозвола; 

– сообраќајна дозвола;

– зелен картон (меѓународно осигурување);

– полномошно ако возите туѓо возило.

„Нова Македонија“

;

;