Јавното обвинителство реагираше остро на барањето на родителите на загинатите во трагедијата во кочанската дискотека „Пулс“ да се врати обвинителката Ивана Алексова Трајчева на предметот против обвинетите полицајци.
Од Обвинителството категорично уверуваат дека ниту еден започнат процес нема да трпи неоправдано одолговлекување или усложнување и дека во судницата секогаш ќе има јавен обвинител подготвен да го застапува обвинението.
„По последните одлуки на Советот на јавни обвинители за избор на обвинители во Основното јавно обвинителство за гонење на организиран криминал и корупција, веќе ги преземавме сите потребни чекори за да се овозможи ефикасност и непречено водење на сите тековни постапки“, се вели во реакцијата.
Јавното обвинителство потсетува дека евентуалната промена на јавен обвинител во текот на постапката не се одразува врз динамиката и начинот на водење на случајот.
„Промената на обвинител судот ја нотира, а судењето продолжува онаму каде што запрело, односно нема никаква потреба за повторување на постапките“, нагласуваат од Обвинителството.
Од таму апелираат на внимателно и одговорно јавно коментирање и информирање за предметите поврзани со кочанската трагедија, бидејќи, како што велат, невистините и шпекулациите за наводно одолговлекување на постапките длабоко ги вознемируваат семејствата на жртвите и целокупната јавност.
Јавното обвинителство упати повик и до Здружението на новинари, како и до другите професионални организации, да апелираат за почитување на етичките стандарди при известување и за воздржаност при коментирање на оваа трагедија, за да не се дозволи нова виктимизација на најпогодените.
„Апелираме и до сите останати повикани јавно одговорни чинители да придонесат за ефикасност на постапките, но и за одмереност во јавните настапи и коментари каква што налага сериозноста на последиците и колективната траума предизвикана од пожарот во ‘Пулс’. Како држава, на повредените и на семејствата на жртвите, но и на сите граѓани, им должиме законита и достоинствена судска постапка која ќе ги даде одговорите и очекуваната правда. Јавното обвинителство презема сѐ што е во негова надлежност за тоа да го испорача, без непотребни одолговлекувања и усложнувања“, се заклучува во реакцијата.