Поранешниот претседател на Градската организација на СДСМ, Васко Кичевски, преку објава на социјалните мрежи упати критики до актуелното раководство на партијата, оценувајќи дека со својот пристап ги оттурнува долгогодишните членови и создава дополнителни поделби во опозицијата.
„Колку е жално да гледаш како мојата партија ја водат луѓе кои немаат осет за СДСМ. Од група луѓе кои во суштина се СДСМ, луѓе кои не можат да бидат ништо друго освен СДСМ, вие правите противници. Со секој нов ден ги туркате сè поблиску кон создавање нова партија“, напиша Кичевски.
Според него, ваквиот однос најверојатно произлегува од страв за сопствените партиски позиции, но, како што наведува, со тоа дополнително се продлабочуваат поделбите во опозицискиот блок. Кичевски смета дека наместо јавни напади кон сопартијците, раководството требало да иницира разговор и обединување.
„Tребаше да се подаде рака и да се повикаат на разговор. Не преку некој од младината, туку директно од претседателот. Претседател кој секој ден држи по две до три прес-конференции требаше јавно да ги повика, да седне со нив и да ги праша зошто, ако се гради ваков фронт, тој не е дел од тој процес“, наведува тој.
Во објавата додава дека актуелното раководство, според него, остава впечаток дека е уплашено од новата политичка платформа.
„Наместо да бара обединување, создава нова поделба. А таа поделба само дополнително ќе го влоши резултатот на СДСМ на следните парламентарни избори“, порача Кичевски.