Во седиштето на Единицата за брзо разпоредување (ЕБР) во Скопје денеска им беше оддадена почит на нејзините припадници што ги положија своите животи во служба на државата, безбедноста и граѓаните.
Во присуство на нивните семејства пред споменикот подигнат во нивна чест се поклонија и положија цвеќе директорот на Бирото за јавна безбедност, Александар Јанев, градоначалникот на Ѓорче Петров, Александар Стојкоски, пратеникот Бојан Стојановски, претставници на синдикатите и колегите од специјалните единици на БЈБ.
„Нивните имиња и нивните дела никогаш нема да бидат избришани од нашата полициска и институционална меморија. Тие остануваат траен симбол на храброст, чест и пожртвуваност. Нивниот живот положен за татковината е аманет за сите нас чесно, одговорно и посветено да ја чуваме безбедноста на граѓаните и интегритетот на државата“, пред присутните истакна директорот на БЈБ, Јанев, додавајќи дека најтешко им е на нивните семејства и нагласувајќи дека „полицијата и раководството секогаш ќе бидат покрај нив, затоа што тие се дел од нашето големо полициско семејство“.
Јанев го отвори и меморијалниот турнир во чест на загинатите припадници на ЕБР, на кој учествуваат 14 екипи од различни организациски единици на полицијата.
„Со спортски дух, со заедништво и со фер-плеј, продолжуваме да го чуваме споменот на луѓето кои не дозволија стравот да биде посилен од должноста. Некои дадоа многу, тие дадоа сè. Полициската професија не е само работа, таа е заклетва. Заклетва дека ќе бидеме тивки чувари на мирот, спокојот и безбедноста на граѓаните и на државата. За тоа сме обучувани, за тоа ја носиме униформата и за тоа сме подготвени да служиме чесно и достоинствено, дури и по цена на сопствениот живот“, порача тој.