Откако неговото име беше официјализирано како кандидат на ДУИ за градоначалник на Чаир, Бујар Османи утрово објави видео на социјалните мрежи во кое рече дека не може да ги скрие емоциите.
„Добро утро Чаир, 6 часот е и ова е првиот ден кога се будам како официјален кандидат за градоначалник на општината и не можам да скријам дека емоциите се големи. Синоќа телефонот не престана да ѕвони, пораки со честитки, повици. Од стари пријатели, од луѓе кои никогаш не сум ги сретнал. Но едно нешто ми остави впечаток. Во секој глас забележав надеж дека Чаир може да се промени, дека заедно можеме да ја извлечеме општината од оваа состојба“, изјави Бујар Османи, кандидат на ДУИ за Чаир.
На неговата кандидатура реагираше коалицијата ВЛЕН, од каде што велат дека Османи на Албанците им понудил само „дипломатија со селфи“, блокирани европски интеграции и маркетинг за себе.
„Бујар Османи изгледа посреќен меѓу српските дипломати отколку со своите сограѓани од Чаир. Не им помогнал на никого, не бил присутен покрај никого во Чаир, не одговорил на никого на телефон. Во Чаир не помогнал за ниту едно ново училиште, не бил присутен кога се градеа улици и булевари, ниту кога се правеа градинки и детски игралишта“, велат од ВЛЕН.