Пожарите во Кавадаречко повторно се активирани поради неповолните атмосферски услови и силниот ветер. Полицијата разговара со осомничено лице за подметнување на пожарот. Екипите вложуваат максимални напори за ставање на огнот под контрола и апелираат до граѓаните за претпазливост.
Пожарот во атарот на селото Раец, кој синоќа избувна на пет локации, повторно се разгори поради високите температури и ветрот, соопшти градоначалникот на Кавадарци Митко Јанчев. Тој истакна дека сите расположливи екипи се на терен и работат со полн капацитет за локализирање на стихијата.
Пожарникарите и екипите цела ноќ се бореле со огнот на исклучително непристапен терен. Успеале да ги локализираат жариштата, но временските услови предизвикале ново активирање. Граѓаните се повикуваат да не се движат во загрозените подрачја и веднаш да пријават ако забележат ново жариште или сомнително однесување.
Директорот на Дирекцијата за заштита и спасување Стојанче Ангелов потврди дека постои осомничено лице за подметнувањето на пожарот.
„Лицето било забележано, потоа побегнало, а подоцна било пронајдено. Полицијата разговара со него“, изјави Ангелов и додаде дека МВР работи на целосно расчистување на случајот.
Тој информираше дека вчера низ државата биле регистрирани околу триесет пожари на отворен простор, од кои голем дел биле предизвикани од човечки фактор.
„Доволна е една искра за да избувне пожар. Казните се високи, а полицијата работи на откривање на сите сторители“, порача Ангелов.