Партијата ВРЕДИ ја обвини ДУИ за злоупотреба на протестот за полагање правосуден испит на албански јазик најавен за утре.
„Цела јавност веќе сфати дека некои ‘студенти’ влегоа во валканата игра на ДУИ. Овие не ги претставуваат студентите, туку агендата на ДУИ. Ги користат како алатка за да ги вратат во живот Бујар Османи, Блерим Беџети, Талат Џафери и другите фотелјаши од ДУИ, кои народот ги избрка на избори“, порачаа од донеодамнешната коалиција од пет партии на Албанците од Македонија што се интегрираа во еден политички субјект.
„Овие не се гласот на студентите. Овие се гласот на ДУИ. Политички инструмент на партија што 20 години си тераше луксуз, функции, тендери и агалак, а сега се крие зад младите, за преку мала врата да се врати на власт.
Дваесет години ДУИ имаше министри, пратеници, претседател на Собрание, технички премиер, директори и апсолутна власт. А правосудниот испит на албански јазик не го средија никогаш, туку само оставаа пречки и кочници.
Истите тие што молчеа сите овие години, сега ги пуштаат децата на своите функционери по протести. Прашањето е едноставно: ‘Против кого протестираат? Против сопствените родители?’
Ова е прочитана и провидна игра, осудена на пропаст уште од старт.
Овој филм нема да им помине. Нема да дозволиме младите да се користат за политички агенди на ДУИ. Правосудниот испит на албански јазик, како и сите прашања што овие фотелјаши ги оставија недовршени, ВЛЕН ќе ги реши одговорно“, се вели во соопштението од владејачката партија.