Времето денеска ќе биде сончево и топло со мала до умерена локална облачност и услови за краткотрајна нестабилност во попладневните часови. Ќе дува умерен повремено засилен ветер од северозападен правец. Минималната температура ќе биде во интервал од 13 до 20, а максималната ќе достигне од 31 до 39 степени.
Во Скопје, сончево и топло со мала до умерена облачност. Ќе дува слаб до умерен ветер од променлив правец. Минималната температура ќе се спушти до 20, а максималната ќе достигне до 39 степени.
Топлотниот бран што ја зафати Македонија ќе продолжи и во наредните денови, а според метеоролошките прогнози, високите температури ќе се задржат до крајот на неделата.
Температурите во најтоплиот дел од денот ќе достигнуваат околу 39 степени, додека во повеќе места се очекуваат и тропски ноќи, со минимални температури кои тешко ќе се спуштаат.
Дополнителен фактор ќе биде сахарската прашина која се очекува да пристигне над Македонија од петок и да се задржи во текот на продолжениот викенд, односно на 28, 29 и 30 август.
Поради присуството на прашина, небото може да биде заматено, а воздухот да изгледа нечист. Во комбинација со високите температури и спарното време, условите ќе бидат особено непријатни за престој на отворено.
Особено внимателни треба да бидат метеопатите и лицата чувствителни на временските промени, кај кои ваквите услови може да предизвикаат засилување на тегобите.
Се препорачува во најтоплиот период од денот да се избегнуваат непотребни излегувања и физички активности на отворено, да се внесуваат доволно течности и редовно да се следат официјалните временски и здравствени препораки.