Одделот за внатрешна контрола, криминалистички истраги и професионални стандарди при МВР до ОЈО Битола поднел кривична пријава против Д.М. на работно место „полицаец“ во ПС за ГП и ГН Меџитлија, товарејќи го за „безобѕирно управување со моторно возило“, по член 297-а став 2 од Кривичниот законик. Пријавениот, надвор од работното време, на 1 април на ул. „8 Септември“ во Битола управувал негов автомобил „бмв“ во време кога имал активна забрана за управување со моторно возило од „Б“ категорија. Покрај тоа, возилото го управувал со брзина од 98 км на час во населено место каде дозволената брзина била 50 км.
Згора на сѐ, бил под присуство на 0,73 промили алкохол. По насоки дадени од страна на јавен обвинител, моторното возило е одземено. Внатрешна контрола поднела предлог за поведување постапка за утврдување на дисциплинска одговорност и изрекла задолжителни мерки одземање на службеното оружје и муниција и упатување на задолжителен психијатриски и психолошки преглед.