Во заклучокот на нацрт-резолуцијата, која треба да се најде пред пратениците на пленарна седница во јануари 2026 година, се истакнува дека Парламентарното Собрание одлучи да го затвори пост-мониторинг дијалогот со Македонија и да ги следи случувањата во земјата во однос на плуралистичката демократија, владеењето на правото и човековите права во рамки на своите периодични прегледи. Со ова по 25 години Македонија успешно го завршува пост-мониторинг дијалогот со Парламентарното собрание на Советот на Европа.
Нацрт-резолуцијата, изготвена од известителите Сибел Арслан од Швајцарија, од групата на Социјалистите, и Џозеф О’Рајли од Ирска, од Европските народни партии, беше усвоена со големо мнозинство на седница на Мониторинг-комисијата. Во таа нацрт-резолуција се наведува дека Македонија стана членка на Советот на Европа во 1995 година и до 2000 година, беше под целосна постапка на мониторинг, на набљудување, што значи дека Советот внимателно следеше дали земјата ги исполнува своите обврски прземени при приемот во Организацијата.
Во 2000 година Парламентарното собрание усвои Резолуција со која се заврши целосната мониторинг-постапка и земјата се префрли во т.н пост-мониторинг дијалог. Овој нов механизам се насочи на специфични преостанати прашања, наведени во Резолуцијата, како и на сите нови прашања, кои се поврзани со одговорностите на земјата како членка на Советот на Европа. Оттогаш Парламентарното собрание и неговата Мониторинг комисија редовно го оценуваа напредокот на Македонија во областите на демократијата, владеењето на правото, заштитата на човековите права и односите со соседните земји, се вели во соопштението од прес-службата на Собранието на Република Македонија.
Оттаму појаснуваат дека мониторинг-комисијата на Парламентарното собрание на Советот на Европа го следи почитувањето на демократските стандарди, на кои земјите-членки се согласиле при пристапувањето, особено прашањата како што се човековите права, владеењето на правото и слободните избори. Комисијата подготвува извештаи за напредокот на секоја земја и препорачува чекори за подобрување. Во ова работно тело членуваат 93 пратеници кои ги назначува Парламентарното собрание врз основа на номинации од шесте политички групи.
Во оваа Комисија, која има за цел да ги поддржи земјите во исполнувањето на нивните обврски кон Советот на Европа, членуваат шефот на делегацијата на Собранието на Република Македонија во Парламентарното собрание на Советот на Европа Марија Петрушевска и членот на делегацијата Бисера Костадиновска-Стојчевска.