Македонската заедница во Австралија одбележува половина век од првите часови по македонски јазик во Нов Јужен Велс, кои почнале на 29 мај 1976 година во сиднејската населба Њутаун.
Меѓу 400 и 500 деца во почетокот ги посетувале часовите, се присетува еден од првите наставници Тоде Кабровски, во интервју за програмата на македонски на радиото Ес-Бе-Ес.
Во тие први години немало учебници, ниту доволно наставни материјали, но и покрај тоа наставата ја посетувале стотици ученици, вели долгогодишниот претседател на Македонскиот просветно-училишен одбор за Нов Јужен Велс, функција што ја извршувал околу 17 години, а денес е почесен претседател на Одборот.
Првите генерации учеле во многу скромни услови, често без доволен број столчиња, па децата седеле на перничиња на подот, но силната волја и посветеноста на наставниците и родителите биле посилни од сите предизвици.