Вчерашната акција на Агенцијата за храна и ветеринарство (АХВ), спроведена со поддршка на полициските сили, за одземање на неконтролираниот добиток во Крива Паланка, доби драматичен пресврт со приведувањето на 27-годишната Јулија Ѓорѓиевска.
Според официјалните информации од Министерството за внатрешни работи, младата жена била лишена од слобода околу 9:35 часот во близина на градскиот базен.
Во тој момент инспекторите се обидувале да ги соберат кравите кои веќе со години слободно талкаат низ регионот и претставуваат сериозна безбедносна и имотна опасност за локалното население.
Наместо да ја овозможи извршната постапка, Ѓорѓиевска се фрлила во потера по стадото, трчајќи по ридовите, викајќи и обидувајќи се да ги насочи животните кон планинските предели, со цел директно да го попречи спроведувањето на решението за заплена.
Овој инцидент не е изолиран случај, туку дел од подолготрајна низа на конфликти поврзани со семејството Ѓорѓиевски.
Уште во декември минатата година дојде до насилни судири при слична интервенција, кога беа приведени Јулија и нејзиниот татко, а тогашните извештаи укажуваа на агресивно однесување, вклучително и физичко напаѓање врз службените лица.
Поради тоа Обвинителството тогаш побара, а судот одобри мерки за притвор.
Граѓаните на Крива Паланка и околните села, особено Жидилово, веќе подолго време упатуваат апели до надлежните институции.
Тие се жалат дека околу 500 грла добиток (според некои извори и до 600) се движат без никаков надзор, предизвикувајќи штети на приватни имоти, земјоделски површини, градини и јавни површини.
И покрај вчерашната акција и приведувањето, на терен биле заловени единствено десетина крави, додека голем дел од стадото успеало да се повлече кон повисоките предели и продолжува да се движи неконтролирано.
Против Јулија Ѓорѓиевска, по целосно документирање на настаните, ќе биде поднесена кривична пријава за „спречување на службено лице во вршење на службено дејствие“.
(ВИДЕО) Русокоса газдарица дели боксови во кал – Ескалира ,,Кравјата криза” во Крива Паланка