Македонија

Премиерот има предлог за Правосудниот испит на албански јазик – Бара да не се паѓа во замка на криминалците

Брзо ќе дојдеме до решение кое сите треба да го поддржиме и кое ќе ги надмине индивидуалните партиски и политички интереси и тенденции

Говорејќи во црквата „Света Софија“ во Охрид, на свечената академија по повод Денот на сесловенските просветители „Свети Кирил и Методиј“, премиерот Христијан Мицкоски изјави дека е подготвен да се разговара за употребата на јазиците при полагањето на правосудниот испит, нагласувајќи дека нема пречка и заедниците да имаат право да напредуваат и да го користат својот јазик, во рамките на Уставот и законите.

Мицкоски додаде дека образованието е клучот за развојот и дека одлуките во оваа насока треба да ги надминат политичките интереси и да се избегнат „националистичките замки“, најавувајќи дека наскоро може да се постигне решение прифатливо за сите.

„Колку и да нè повлекуваат дневните теми, важно е на некои од нив сериозно да им се посветиме. Колку и да има политика и интереси во позадина при наметнувањето на темата за употребата на јазиците при полагањето на правосудниот испит, јас сум подготвен и на некој начин ми е драго што конечно можеме да зборуваме за образованието, но разговорите мора да се постават во вистински контекст.

Подготвен сум да помогнам во секој процес што би значел подобро и посилно образование. Сметам дека вратата на можностите и спасот за секого е токму силното образование. Тоа нè прави посилни. Тоа може да ја изгради нашата иднина. Единствената шанса за успех е учењето, посветеноста и отворањето нови перспективи.

Немам никаква пречка да се разговара за темите што денес се актуелни и секоја заедница да има право да напредува и да го користи својот јазик, секако додека тоа е во рамките на Уставот, законите и додека се почитува нашиот идентитетски печат – македонскиот јазик.

Затоа многу брзо ќе дојдеме до решение кое сите треба да го поддржиме и кое ќе ги надмине индивидуалните партиски и политички интереси и тенденции, за да не западнеме во уште една националистичка замка. Историјата нè учи дека таквите замки се најдобар метод за оние кои имаат лични криминални или други интереси и редовно се кријат зад вакви теми, кои служат како покритие за вистинските намери – злоупотреба на соживотот и создавање поделби“, изјави Мицкоски.

Најнови вести од: Македонија

Мицкоски во Берлин на собир на ,,Коалицијата на волните”

Премиерот Христијан Мицкоски, заедно со министерот за надворешни работи и надворешна трговија Тимчо Муцунски, денеска во Берлин учествуваше на состанокот на Коалицијата на волните посветен на актуелната состојба во Украина и напорите за постигнување мир

АмЧам: Реформите, иновациите и меѓународните стандарди предуслов за подобра здравствена заштита

Американската стопанска комора во Македонија е акредитиран член на Стопанската комора на Соединетите Американски Држави и на мрежата на Американски стопански комори во Европа, организација која претставува 49 Американски стопански комори од 47 земји во Европа и Евроазија.

Велјановски до опозицијата: Не може да се заборави како ја пљачкавте државата

На денешната собраниска седница на Комисијата за финансирање и буџет каде се дискутираше Предлог-Буџетот за 2027 година, пратеникот од ВМРО-ДПМНЕ, Александар Велјановски, кажа дека и покрај долговите наследени од претходната влада, предводена од СДС, кои се тежок товар за државата, оваа Влада предводена од ВМРО-ДПМНЕ ќе продолжи со силни инвестиции, со работа на фискална консолидација, но и со зајакнување на здравствената и социјалната заштита на граѓаните.

Ристески: Клучен приоритет на Владата е да ги задржи младите во Македонија

Законот за сезонски работници што е во сила од 1 јануари 2026 година, сѐ уште не ги дава очекуваните резултати, но ова не е закон направен за една година. Затоа организираме информативни средби и настани со помош на медиумите, стопанските комори, работодавачите и синдикатите – за да ги анимираме луѓето дека пензионери, студенти, оние кои сакаат дополнително да работат и сите категории невработени лица можат да го искористат, без притоа да го изгубат стекнатиот статус, да имаат комплетно пензиско и здравствено осигурување, фер ангажман, платен работен час колку што се ангажирани дополнително и со тоа да остварат дополнителни приходи – рече денеска заменик-министерот за економија и труд, Марјан Ристески.

Општина Охрид ги засилува активностите за затворање на депонијата „Буково“ и воспоставување нов систем за комуналниот отпад

Завршена е постапката за избор на проектант за изработка на техничката документација за затворање на нестандардната депонија „Буково“, а во тек се и активностите за изградба на претоварна станица кај Мауцкер и собирен центар во Охрид. Претоварните станици и Регионалниот центар за управување со отпад во Новаци се очекува да бидат функционални во 2030 година. Ова беше истакнато на денешната средба во Општина Охрид, посветена на новиот Регионален план за управување со отпад и воспоставувањето интегриран систем за Југозападниот и Пелагонискиот плански регион.

To top