„СДСМ има статут, има програма и други акти и внатрепартиски структури, постојат демократски начини на решавање на проблемите и тоа е добро, прво за нив, но и за сите нас, бидејќи без силна опозиција не може да има демократија, не може да да има парламент, што ќе донесува добри одлуки, оти се тие коректорот на власта.“ – нагласи шефицата на македонската држава Сиљановска-Давкова по посетата на училиштето „Партенија Зографски“ во Скопје.
Таа дополни: Посакувам час поскоро со помош на членството да ги надминат проблемите. Многу партии се соочувале со вакви проблеми не само кај нас, туку и надвор. Мојата порака е дека оваа партија има долга историја, меморија, имала големи победи и успеси, и како и другите партии имала и кризи. Се надевам дека од кризата ќе излезат со нови решенија и ќе станат повторно активен чинител и актер на македонската демократија.
Инаку, вчера, целото раководство на СДСМ заедно со членовите на Извршниот одбор поднесе оставки по барање на лидерот Венко Филипче. Според најавите на Филипче, во следните две седмици треба да се свика Централниот одбор на партијата, кој ќе се изјасни за новите членови. Тој истакна дека „се бараат најквалитетните и најкомпетентни личности за новите функции“.