Лидерот на ДУИ, Али Ахмети, денеска оствари „пријателска средба“, како што ја нарече, со поранешниот еврокомесар за проширување, а потоа и за буџет и администрација Јоханес Хан.
„Разговаравме за стратешката важност на интеграцијата на земјата во Европската унија, како клучен процес за долгорочна стабилност, демократска консолидација и зајакнување на владеењето на правото. Нагласив дека европскиот пат останува неспорен приоритет и национален интерес, кој бара одговорност и политичка определба. Во тој контекст беше истакната важноста на целосната и доследна имплементација на Охридскиот договор како основа на демократскиот соживот и функционирањето на мултиетничката држава, согласно европските стандарди. Исто така, ја потврдивме потребата од одржливи реформи и конструктивен политички дијалог, кој ја зајакнува довербата меѓу заедниците и го зголемува меѓународниот кредибилитет на земјата во процесот на европската интеграција“, вели Ахмети во објавата на Фејсбук.