Казните регистрирани преку системот „Безбеден град“ за возила со црвени таблици најчесто пристигнуваат до лизинг компаниите наместо до возачите, бидејќи тие се заведени како формални сопственици на автомобилите. Ова го потврдуваат од повеќе лизинг куќи, кои велат дека административниот товар и обврската за идентификација на вистинскиот прекршител целосно паѓа на нив.
Кога камерите од системот „Безбеден град“ ќе регистрираат прекршок – како пребрзо возење или поминување на црвено светло – сообраќајната казна автоматски се генерира на името на сопственикот на возилото. Кај возилата со црвени таблици тоа речиси секогаш е лизинг компанијата, а не корисникот кој реално управувал со автомобилот во моментот на прекршокот.
Компаниите објаснуваат дека мора дополнително да ги следат казните, да ги известуваат клиентите и да бараат нивна потврда или податоци за лицето кое го управувало возилото, што го продолжува процесот и предизвикува доцнења во наплатата. Дополнително, можно е да се пропушти и рокот од 8 дена во кој се плаќа половина од казната.
Од МВР засега не најавуваат промени во процедурата, бидејќи системот функционира според важечката законска рамка – казната се издава на формалниот сопственик, а тој има обврска да го пријави вистинскиот возач.
Лизинг компаниите, пак, бараат појасни решенија и измена на законските одредби, со цел прекршоците регистрирани од „Безбеден град“ да можат побрзо и поефикасно да се проследат до лицето што реално го сторило прекршокот.