Скопје влегува во нова ера на управување: градоначалникот Орце Ѓорѓиевски најави дека буџетот за 2026 година ќе биде првиот во историјата на главниот град создаден со вистинска, а не декларативна партиципација на граѓаните, бизнисот и јавниот сектор. Наместо во затворени кабинети, иднината на градот ќе се крои на отворено – со секој скопјанец како потенцијален соавтор.
„Транспарентноста отсекогаш била моја водилка. Затоа годинава го отвораме процесот на изработка на буџетот за 2026 година заедно со вас, граѓаните, невладиниот сектор и бизнис заедницата. Вашите потреби и идеи ќе бидат основата на овој документ“ – порача Ѓорѓиевски.
Од Град Скопје велат дека буџетот повеќе нема да биде само сува табела со бројки, туку жив документ – огледало на реалните потреби и соништа на скопјани. Во него ќе се вградени приоритетните капитални проекти, новите зелени коридори, спортските и културните содржини, како и сите оние мали и големи работи што го прават градот поубав и подостоинствен за живот.
„Ова е моментот кога секој може да влијае со конкретна идеја, предлог или забелешка. Само со заедничка визија и мудро планирање можеме да изградиме силно и достоинствено Скопје“ – додаде градоначалникот.
Процесот е веќе отворен. Сите предлози, идеи и забелешки се добредојдени на официјалната мејл-адреса: gradskibudzet2026@skopje.gov.mk.
Вратата е ширум отворена. Скопје чека на вашиот глас.