Почитувани сограѓани, сопартијци и пријатели. Сакам да ве информирам дека донесов одлука и поднесов оставка до претседателот на СДСМ, Венко Филипче да се повлечам од функцијата претседател на Општинската организација на СДСМ Струмица, порача Марјан Даскаловски во соопштение до јавноста.
Оваа одлука ја носам со мирна совест и чисто срце, водена пред сè од лични причини. Изминатиот период беше исполнет со многу работа, заеднички победи, но и предизвици со кои се соочувавме секогаш со крената глава и со мисла за доброто на Струмица, пишува во соопштение до јавноста Даскаловски.
„Сакам да упатам огромна и искрена благодарност до сите членови, симпатизери, активисти и до моите најблиски соработници за огромната поддршка, довербата и енергијата што ја вложивме заедно.
Чест ми беше да ја предводам оваа организација и да работам со луѓе кои искрено го сакаат својот град.
На идниот претседател и на новото раководство им посакувам многу успех, мудрост и нова енергија во водењето на партијата на локално ниво.
Јас останувам тука, како пријател и поддржувач, секогаш подготвен да помогнам со своето искуство и знаење секаде каде што е потребно” напиша Марјан Даскаловски – поранешен кандидат од СДСМ за Струмица.
Видео: Функционери од СДСМ признаваат дека рејтингот е мал, но се спремни за избори – Expres
Случајно или пак не, ова следи еден ден откако Даскаловски за ТВ Алфа призна дека рејтингот на СДСМ е мал. Видеото може да ги погледнете на следниот линк.
Даскаловски важеше за човек близок до екс претседателот на партијата Зоран Заев.