Ригорозните казни за бучава во Аеродром одат до 69 илјади евра

Општина Аеродром започнува со интензивни контроли и мерења на прекумерната бучава, со јасна цел – заштита на здравјето, мирот и квалитетот на живеење на сите граѓани.

Согласно со член 9 од Законот за заштита од бучава во животната средина, забрането е емитирање бучава над пропишаните гранични вредности.

Во станбените објекти, во вечерниот период од 19 до 23 часот, дозволеното ниво на бучава не смее да надмине 35 dBA, а во ноќниот период од 23 до 7 часот, дозволеното ниво на бучава не смее да надмине 30 dBA.

Овластените инспектори за животна средина на Општина Аеродром ќе вршат интензивни и континуирани контроли, особено кај угостителските и туристичките објекти, со цел доследно почитување на законските норми.

Санкциите се високи и строго ќе се применуваат:

• 6.000 – 7.000 евра (денарска противвредност) за микротрговци
• 13.000 – 14.000 евра за мали трговци
• 37.000 – 41.000 евра за средни трговци
• 62.000 – 69.000 евра за големи трговци
• 2.000 евра за трговец поединец

Глобите се изрекуваат доколку нивото на бучава при вршење на угостителска и туристичка дејност ги надминува пропишаните гранични вредности.

Апел до граѓаните:
Доколку сте изложени на прекумерна бучава, пријавете веднаш на:
inspekcija@aerodrom.gov.mk
Заедно воспоставуваме ред, почитување на законот и мирна животна средина за сите.
Мирот во Аеродром нема цена – но непочитувањето има последици.