Инспекциски тим на Електродистрибуција откри сериозна манипулација со електрично броило во станбена куќа во Штип, во сопственост на локален бизнисмен. При контролата на објектот на улица „Борко Талев“ утврдено е дека сите три фази на броилото биле намерно оштетени, со цел неовластено користење електрична енергија.
„Констатиравме противправна манипулација и неовластено преземање струја. Составен е официјален записник, а случајот е пријавен во полиција согласно член 235-а од Кривичниот законик“, соопштуваат од Електродистрибуција.
Компанијата поднесе кривична пријава против сопственикот, 60-годишниот С.А. од Штип, и издаде фактура за причинета штета во висина од 364.658 денари.
Од СВР Штип потврдуваат дека на 29 октомври 2025 година, по добиена пријава, утврдиле дека С.А. поставил премостување на електричниот кабел пред броилото на адресата „Борко Талев“ бр. 6, со што целата потрошувачка останувала нерегистрирана. Полицијата најави целосно расчистување на случајот и преземање соодветни законски мерки.