Претседателката Гордана Сиљановска-Давкова најави дека утре во Софија ќе оствари средба со Илијана Јотова која ја врши функцијатѕа претседател на Бугарија по оставката на Румен Радев.

Средбата треба да се случи на маргините на Самитот на Процесот за соработка во Југоисточна Европа.

Шефицата на македонската држава очекува разговорите да бидат продолжение на нивната претходна средба во Ереван, но и можност да се отворат суштинските прашања во односите меѓу двете земји.

Во интервју за „360 степени“ на МРТ 1, Силјановска-Давкова истакна дека нема нерешливи проблеми и дека единствениот начин за напредок е преку градење доверба и поголема меѓусебна комуникација.

„Тоа е природно продолжение на нашата средба во Ереван – едно пријатно женско говорење. Мислам дека треба да го продолжиме тоа и затоа ја споменав неопходноста од мерки за градење доверба.

Ако граѓаните не контактираат, ако заеднички не учествуваме во проекти, тешко ќе се движиме напред“, рече претседателката.

Таа потсети и на својата прва средба со бугарскиот претседател Румен Радев во Софија, кога, како што кажа, јавноста го запаметила инцидентот со знамињата, но не и пораките за соработка што биле испратени на работниот ручек.

„Треба bona fide да се однесуваме едни кон други. Да не се навредуваме, да не се повредуваме и да се обидеме да ги мериме зборовите“, нагласи Сиљановска-Давкова.

На забелешката дека остри пораки доаѓаат од двете страни, таа се согласи со оценката.

„Целосно сте во право. Од двете страни. И еве сега од двете страни има желба да се видиме“, изјави претседателката.