Македонија Бизнис

Со нов Закон ќе се олеснува поставувањето на фотоволтаици на покривите

Со предлог измените се поедноставува и постапка за приклучување на електродистрибутивната мрежа на потрошувач-производител кој користи обновливи извори на енергија.

Министерството за енергетика подготвува ново законско решение со кое ќе се зголеми прагот за кровните фотоволтаици на домаќинствата или потрошувачите-производители до 10 киловати, дознава „Фактор“. Истовремено ќе се скрати рокот за издавање на дозволи за инсталација на кровни фотоволтаици. За првпат во законската регулатива се предлага да се воведе законски рок за административната постапка за издавање на дозволи за поставување на кровни фотоволтаици за потрошувач – производител.

Овие измени се предвидуваат во предлозите за изменување и дополнување на Законот за енергетска ефикасност што Министерството за енергетика, рударство и минерални суровини ги објави на ener.gov,mk.

Рокот од еден месец ќе се однесува на постапката за издавање дозвола за поставување соларна опрема со капацитет до 100 киловати, како и за потрошувач-производител на обновлива енергија и за заедници на обновлива енергија. Со измените потрошувачите-производители добија повисоки прагови за своите електрани и тоа за домаќинствата лимитот е до 10 киловати, а компаниите до 70 киловати.

Со предлог измените се поедноставува и постапка за приклучување на електродистрибутивната мрежа на потрошувач-производител кој користи обновливи извори на енергија.

– Доколку при анализа на условите за приклучување се утврди дека не е можно приклучување на предложената локација, операторот на електродистрибутивниот систем е должен во рок од 15 дена од денот на поднесување на барањето за приклучок, писмено да го извести барателот и да му предложи алтернативна точка за приклучување, врз основа на технички и безбедносни причини или некомпатибилност на компонентите на системот. Операторот на електродистрибутивниот систем е должен да го приклучи енергетскиот објект на електродистрибутивната мрежа во рок од еден месец од официјалното потврдување на комплетноста на поднесената документација. Доколку операторот на електродистрибутивниот систем не се произнесе во рокот од мрежните правила се смета дека согласноста за приклучување е дадена, објави предлагачот.

Министерството предлага и 20-годишна стратегија за реновација на станбени, јавни и комерцијални згради со енергетски ефикасни решенија. Односно, Владата, на предлог на МЕРМС  донесува  и долгорочна стратегија за реконструкција на станбени, јавни и комерцијални згради, со која овие градби и стамбени и деловни објекти ќе ги трансформира   во високо енергетски ефикасни објекти со речиси нулта потрошувачка, со можност за широка интеграција на обновливи извори на енергија (ОИЕ), како што се соларните системи.

Тројно ќе се зголеми и заштедата во јавниот сектор, односно МЕРМС во соработка со Службата за општи и заеднички работи при Владата подготвува  и предлог план за реконструкција на згради кои се користат во јавниот сектор, и тоа со реконструкција на најмалку 3 отсто од корисната подна површина на зградите годишната заштеда на енергија се зголемува од 1 на 3 проценти. Ова се однесува на објекти со вкупна корисна подна површина  над 250 квадратни метри кои не ги исполнуваат минималните барања за енергетски  карактеристики, а кои се користат од страна на лицата од  јавниот сектор на државно ниво.

Инсталацијата на соларни колектори за топла вода во новите јавни објекти или при значајна реконструкција на објекти станува задолжителна, доколку е технички и економски изводливо.

МЕРМС воспоставува и финансиски механизми, јавни повици и едношалтерски систем за поддршка на проекти за енергетска ефикасност и ОИЕ, овозможувајќи инвестиции во соларни панели, геотермални системи и паметни технологии, како механизми за постигнување на целите на Стратегијата за реконструкција.

Јавниот сектор се обврзува да набавува производи, возила и згради со највисоки енергетски и еколошки стандарди, вклучувајќи сертификати за енергетски карактеристики, промовирајќи технологии со низок јаглероден отпечаток.

Измените влијаат и креирање можност за меѓуопштинска соработка за локален развој во општини со помалку од 15.000 жители. Тие можат да формираат заеднички тела за програми за енергетска ефикасност, и со усвојување на програма за енергетска ефикасност ќе добијат пристап и до Фондот за енергетска ефикасност.

Најнови вести од: Македонија Бизнис

Родителите ќе платат околу 10% помалку за училишната кошничка

Во периодот од 15 август до 15 септември, а со цел спречување на растот на цените на училиштниот прибор пред почетокот на учебната 2025/2026 година и заштита на животниот стандард на граѓаните, како дел од кампањата „Помалку трошоци, повеќе за тебе, се грижиме“, Владата донесе одлука и ги задолжи трговците да ги намалат цените на […]

Сиљановска-Давкова ги прими виолинистот Џек Либек и пијанистката Катја Апекишева

Претседателката Гордана Сиљановска-Давкова ги прими британските уметници, виолинистот Џек Либек и пијанистката Катја Апекишева, коишто вечерва ќе настапат на британската вечер, во рамки на 65. издание на Охридско Лето. На средбата во вила Билјана во Охрид присуствуваа и директорот на фестивалот Ѓорѓи Цуцковски, како и Клер Сирс, директорка на Британскиот Совет. Истакнувајќи дека имаат чест […]

Америка најави 100% царини на чипови – гигантот „Епл“ ослободени од новите давачки

Глобалната побарувачка за компјутерски чипови расте, а продажбата е зголемена за 19,6 отсто во годината што заврши во јуни, според Светската организација за статистика на трговијата со полупроводници.

Над 10.000 европски хотели ќе го тужат „Букинг“

Правната тужба, поддржана од HOTREC и повеќе од 30 национални хотелски здруженија, е отворена за сите хотели кои ги исполнуваат условите, без никакви трошоци или ризик. Рокот за приклучување кон колективната тужба ќе овозможи, според HOTREC, поголем број хотели да се приклучат за време на „прометната летна сезона“.

To top