Попладнево Министерството за внатрешни работи информираше дека е поднесена кривична пријава против поранешниот министер за внатрешни работи Оливер Спасовски поради сомнение за „злоупотреба на службената положба и овластување“.
На ваквата објава, Спасовски реагираше остро, оценувајќи дека постапката е политички мотивирана.
Оливер Спасовски се соочува со повеќегодишна затворска казна
„Во целост ги отфрлам наводите во т.н. пријава. Не ме изненадуваат методите – ништо ново, МВРО-ВМРО се враќа на сцена секогаш кога треба да се дефокусира јавноста од реалните скандали на власта,“ изјави Спасовски.
Тој додаде дека, според него, денешниот потег има за цел да го пренасочи вниманието од актуелните горливи теми.
„ВМРО-ДПМНЕ бега и сака да го оттргне вниманието од трагедијата во Кочани, мигрантите, криминалите и лошата економска состојба. Ова е класичен обид за политички прогон,“ нагласи поранешниот министер.
Спасовски истакна и дека е нејасно дали на власта повеќе ѝ пречат резултатите што ги постигнал како министер, или неговата актуелна улога и настапи како опозициски политичар.
Случајот е во тек, а МВР најавува дека ќе следуваат дополнителни постапки во рамките на истрагата.