Ставот на Сиљановска-Давкова за правото на абортус останува непроменет, објави вечерва Радио Лидер.
По реакцијата на Мрежата за заштита од дискриминација во врска со средбата на претседателката Гордана Сиљановска-Давкова со претставнички на Здружението „Јас Сум Жена“, редакцијата на Лидер се обратила до Кабинетот за појаснување на околностите и ставот на претседателката за правото на абортус.
Одговорот од Кабинетот упатува на официјалното соопштение, во кое се наведени темите на разговорот, со нагласување дека абортусот не бил предмет на дискусија, ниту се разговарало за ограничување на репродуктивните права на жените.
Воедно, се прецизира дека средбата била со претставничките на „Јас Сум Жена“, организирана во пресрет на претстојната конференција, а не со членки на здружението „Мајки за Македонија“.
„Ставот на претседателката за правото на абортус останува непроменет: секоја жена има право самостојно да одлучува за сопственото тело, здравје и живот, како израз на личната автономија, достоинството и слободата на избор“, се наведува во одговорот.
Од Кабинетот посочуваат дека Сиљановска-Давкова, како претседателка на сите граѓани, останува отворена за дијалог со невладиниот сектор, при што средбите со граѓанските организации не подразбираат согласување со нивните ставови за сите општествени прашања.
Деталите за разговорот се достапни во официјалното соопштение објавено на веб-страницата на претседателката.