Првиот голем бран туристи по завршувањето на учебната година и почетокот на летниот распуст ги зафати премините на македонско-грчката граница, при што за влез кај јужниот сосед се чека и до три часа на „Евзони“, но и на „Дојрани“.
Сложените процедури што ги наметна системот ЕЕС за влез во Европската Унија на граѓани од земји што не се членки, како и напливот на (пре)полни возила со желни за разладување на море вршат голем притисок врз службениците на граничните премини, па колоните се чинат дека се во недоглед.
„Денеска на Евзони чекавме три часа, од 11 до 14 ч“, вели Ивица Момчиловиќ на српската група „Грчка.инфо“ на Инстаграм.
„Внимание за сите што се упатуваат кон Грција денес. Сабота наутро, а сезоната се чини дека е во полн ек. На влезот преку Дојран, колоната е долга над еден километар, чекањето е повеќе од час и половина, но граничните служби навистина работат толку брзо колку што дозволува ситуацијата“, се вели во друга објава.
Најголемиот дел од намерниците да завршат на плажа во Грција се од Македонија и од Србија, помал број од регионот, но има и возила со регистарски таблички од подалечните европски земји.