МВР ја потврди трагедијата која синоќа го потресе Прилеп: Тројца членови на една фамилија, меѓу кои и 13-годишно дете, беа пронајдени мртви со повреди од огнено оружје.
Министерството за внатрешни работи потврди дека се работи за сериозен безбедносен инцидент, во кој било фрлено и експлозивно средство врз полициски службеници.
Како што се дознава, крвавиот пир започнал вчеравечер, околу 21:20 часот, кога во ОВР Прилеп, 43-годишната К.Ч. пријавила дека нејзиниот сопруг П.Ч. (43) и нивниот 13-годишен син се оддалечиле од домот, со сомнеж дека можеби заминале во куќата на нивниот роднина П.Ѓ. (62).
Полициски службеници веднаш се упатиле на посочената адреса, а во моментот кога полицијата влегла во објектот, едно лице фрлило рачна бомба кон нив. Бомбата почнала да чади, но, за среќа, не експлодирала, дознава Макфакс.
„Полициските службеници веднаш се повлекле од куќата, но одвнатре било пукано кон нив. Во размената на оган, полицијата возвратила со службено оружје.
Неколку часа подоцна, во 01:35 по полноќ, на местото на настанот пристигнала Итна медицинска помош, каде лекарите констатирале смрт кај тројца – таткото П.Ч., 13-годишниот малолетник и 62-годишниот роднина П.Ѓ.“ објави Макфакс