Го зајакнуваме присуството на „Виз Ер“ во Македонија со зголемување на флотата со шести авион во Скопје и 13 нови рути на нашата веќе широка мрежа, инвестирајќи истовремено во професионалниот развој на младата работна сила – вели Јожеф Варади, извршен директор на „Виз Ер“, во интервју за МИА.
Варади истакнува дека со ова се создаваат можности за нови авиолинии, зголемување на фреквенциите на популарни дестинации и поголем избор за патниците по ниски цени. Со шестиот авион се лансираат нови рути од Скопје до Бари, Неапол, Будимпешта, Келн, Штутгарт, Ларнака, Мадрид, Прага и Стокхолм, како и четири нови рути од Охрид до Базел, Милано, Катовице и Вроцлав.
Македонскиот пазар, според него, е еден од најважните во Западен Балкан, а Скопје останува база за постојан раст.
-Со нудење опции за патување со ниски цени им олеснуваме на туристите да ја посетат Северна Македонија и да ги откријат нејзините природни убавини, култура и гостопримство – нагласува Варади.
Тој ги посочува придобивките од зголемени приходи од туризмот, поттикнување на деловните врски, јакнење на интеграцијата со Европа и отворање нови локални работни места за кабински персонал, пилоти и инженери.
Варади и вицепремиерот и министер за транспорт Александар Николоски вчера најавија уште пет авиолинии до Скопје и Охрид, зголемување на флотата со уште еден авион на аеродромот во Скопје и дополнителни 100 вработувања, со што бројот на локални кадри во компанијата ќе достигне 300.
Од летната сезона 2026, аеродромот во Скопје првпат ќе се поврзе со Неапол, а повторно се враќа линијата до Будимпешта. Аеродромот во Охрид добива директни летови до Милано Малпенза и Вроцлав, како и враќање на рутата до Катовице.
Летовите од Скопје до Неапол и Будимпешта ќе започнат на 30 март 2026 година, три пати неделно (понеделник, среда и петок). Од Охрид до Милано Малпенза летовите исто така стартуваат на 30 март, до Вроцлав на 7 јуни, а до Катовице на 8 јуни.
„Виз Ер“ е корисник на државни субвенции од 2012 година. Годинава компанијата најави нови рути од двата македонски аеродрома до Стокхолм и Мадрид од 2 ноември, до Келн, Бари и Прага од 20 декември, како и до Ларнака од 30 октомври.