ВМРО-ДПМНЕ упати критики кон лидерот на СДСМ, Венко Филипче, обвинувајќи го дека се обидува да ги претстави изборните резултати во Брвеница како успех – иако, според владејачката партија, СДСМ завршил на четвртото место.
„Филипче и СДСМ се обидуваат да најдат утеха во освоеното четврто место. Поддршката за СДСМ падна на 5%, а сепак тие слават пораз од 4 спрема 1 од ВМРО-ДПМНЕ на локалните избори во Брвеница“, наведуваат од партијата.
Од ВМРО-ДПМНЕ тврдат дека, под водство на Филипче, СДСМ доживеал политички дебакл, посочувајќи дека партијата е четврта политичка сила во Куманово и Брвеница, а петта во Скопје.
„Бројките и фактите се најдобриот показател за состојбата во која се наоѓа СДС која на чело со Филипче се претвори во партија без политичка визија, без убедлива понуда и без капацитет да се наметне како сериозна алтернатива помеѓу граѓаните.
Филипче под менторство на Заев ја претвори СДС во партија која се радува на порази.
На Филипче и СДС им посакуваме уште многу вакви „успеси“ четврти и петти места, славење на поразите и се помала поддршка од граѓаните“ велат од ВМРО-ДПМНЕ.