Традиционалната слика за европското семејство со многу деца брзо се менува. Најновите податоци на Евростат за 2025 година откриваат длабоки демографски промени во Европската Унија: бројот на семејства со деца се намалува, додека бројот на луѓе што живеат сами или како парови без деца драматично се зголемува.
Од вкупно 203,1 милиони домаќинства во ЕУ, минатата година само 47,4 милиони или скромни 23,4% вклучувале деца.
Најголемиот број од нив се парови со деца (14,7%), по што следат други видови сложени семејства со деца (5,6%) и самохрани родители (3,0%).
Од друга страна, огромното мнозинство, до 76,6%, се семејства без деца. Во оваа категорија доминираат самци (лица кои живеат сосема сами), кои сочинуваат до 37,5% од сите домаќинства во ЕУ.
По нив следат парови без деца со 24,1%.
Трендот во последната деценија (од 2016 до 2025 година) јасно ја покажува насоката што ја следи Европа: Бројот на едночлени домаќинства без деца се зголемил за до 19,2% (од 63,9 на 76,1 милиони);
Бројот на парови без деца се зголемил за 3,3%; Спротивно на тоа, бројот на парови со деца се намалил за 6,3%.
Демографската слика не е иста насекаде во Европа. Највисок процент на семејства со деца е забележан во Словачка (35,4%), Ирска (30,8%) и Кипар (28,2%).
На другиот крај од скалата е Финска, каде што само 18,2% од семејствата имаат деца, а во слична ситуација се Литванија (18,4%) и Германија (19,9%).
Кога станува збор за бројот на деца, половина од европските семејства со деца (50,2%) имаат само едно дете, 37,6% имаат две, а едвај 12,2% одгледуваат три или повеќе деца.
Македонија е сè уште над европскиот просек кај семејствата со деца.
Според податоци Евростат, од вкупно 595,6 илјади семејства во нашата земја, 66,1% (393,4 илјади) се бездетни, додека 33,9 се со деца.
Со овој процент, Македонија е позиционирана многу блиску до Словачка (35,4%) и Ирска (30,8%), кои се на врвот на ЕУ.
Ако ги земат предвид само тие 202,2 илјади семејства со деца и ги погледнеме внатрешните проценти, структурата во нашата земја е следнава:
– Семејства со 1 дете: 43,2% (87,3 илјади)
– Семејства со 2 деца: 43,4% (87,8 илјади)
– Семејства со 3 или повеќе деца: 13,4% (27,1 илјади).
За разлика од ЕУ, каде што половина од семејствата (50,2%) имаат само едно дете, во Македонија доминираат семејствата со две деца (43,4%), а процентот на семејства со три или повеќе деца (13,4%) е исто така повисок од просекот на ЕУ (12,2%).